Consumismo e tradizione nel vernacolo di Mario Mastrangelo

Vene Natale

Vene Natale, vene Natale,

e menu male, menu male

ca vene sulo na vota a l’anno,

cu sti renare ca se ne vanno,

cu st’ammuina r’amice e pariente,

cu sti zampogne ca ‘nt’ ‘e rrecchie siente,

cu sti regale ca nun serveno a niente,

cu sti turrune ca te spezzano ‘e riente.

Cu sti brinnese, sti tavulate

ca addeventano una abbuffata,

quatto o cinche ore assettate

a dice sempe ‘e stesse cazzate.

E te miette cu na penna mmano

pe’ l’augurio a ‘o parente luntano,

ca nun te ricuorde si è muorto o si è vivo

o nun sai che cazzo ce he ‘a scrive.

‘O vicino ca torna r’ ‘a messa

te saluta cu na faccia ‘e fesso:

«Augurie, augurie, Natale felice!.»

E nun tene chiù niente ra rice.

A casa ‘e l’amico ce vai cu ‘a famiglia

e ce puorte na bella buttiglia,

ma rint’ ‘a fretta, senza sapè’,

puorte ‘a stessa c’ha dato isso a te.

A tavula, cu ‘e familiare,

miez’a l’affette chiù care,

‘nt’a chella allegra cunfusione

accumencia na discussione.

Na parulella senza penzà’,

n’ata, è meglio puntualizzà,

na risposta ca nun s’ev’a rà’,

ce s’accumencia a ‘ntussecà’,

èsceno cose ‘e tant’anne fa,

quanno era viva ancora mammà,

ca ognuno se vuleva scurdà’.

«Se capisce, tu sì accussì.»

«Tu certi ccose n’ ‘e vvuò capì!»

«Tu ‘a pacienzia a me m’ ‘a fai perde!»

«Tu tiene nu carattere ‘e mmerda!»

«Famme sentì’! Che càspeta he ritto?»

«No, no, è meglio ca me sto’ zitto.»

«E tu sì sempe tale e quale.»

«Lasciammo stà’, ca ogge è Natale.»

Ogge è Natale, pe’ sta jurnata

quanta parole se so’ sprecate,

quanta robba e renare jettate,

quanta ammuìna, quanta strunzate!

‘E sta festa prefabbricata,

‘e tutto chistu mercato,

nun ce simmo ancora scucciate?

Natale, Natale, Natale, Natale,

e menu male, menu male

ca vene sulo na vota ‘a l’anno.   

                  Mario Mastrangelo (da ‘E penziere r’ ‘a notte, Palladio, 1992)